മണര്‍കാട്‌: യാക്കോബായ സുറിയാനി സഭയിലെ പ്രമുഖ വൈദികനും സുറിയാനി സഭാ പണ്ഡിതനും വാഗ്മിയും മണര്‍കാട്‌ സെന്റ്‌ മേരീസ്‌ കത്തീഡ്രല്‍ സഹവികാരിയുമായ കരിമ്പനത്തറയില്‍ ഏബ്രഹാം കോര്‍ എപ്പിസ്‌കോപ്പ (83) നിര്യാതനായി. സംസ്‌കാരം 21ന്‌ രാവിലെ 10.30 ന്‌ ഭവനത്തിലെ പ്രാര്‍ഥനയ്‌ക്കും നഗരികാണിക്കലിനുംശേഷം ഉച്ചയ്‌ക്ക് 12.30 ന്‌ ശ്രേഷ്‌ഠ തോമസ്‌ പ്രഥമന്‍ കാതോലിക്കാബാവായുടെ മുഖ്യകാര്‍മികത്വത്തിലും അഭിവന്ദ്യ മെത്രാപ്പോലീത്താമാരുടെ സഹകാര്‍മികത്വത്തിലും മണര്‍കാട്‌ സെന്റ്‌ മേരീസ്‌ കത്തീഡ്രലില്‍.
1947ല്‍ മീഖായേല്‍ മാര്‍ ദിവന്നാസ്യോസില്‍നിന്നു ശെമ്മാശപ്പട്ടവും 1957ല്‍ പൗലോസ്‌ മാര്‍ ഫീലക്‌സിനോസില്‍നിന്നു കശീശാപട്ടവും 1993ല്‍ ഗീവര്‍ഗീസ്‌ മാര്‍ ഗ്രിഗോറിയോസില്‍നിന്നു കോര്‍ എപ്പിസ്‌കോപ്പസ്‌ഥാനവും സ്വീകരിച്ചു. മീഖായേല്‍ മാര്‍ ദിവന്നാസ്യോസ്‌, ഏലിയാസ്‌ മാര്‍ യൂലിയോസ്‌, പൗലോസ്‌ മാര്‍ പീലക്‌സിനോസ്‌ എന്നീ മെത്രാപ്പോലീത്താമാരുടെ സെക്രട്ടറിയായിരുന്നു.
അമ്പതിലേറെ വര്‍ഷമായി മണര്‍കാട്‌ സെന്റ്‌ മേരീസ്‌ കത്തീഡ്രലില്‍ സഹവികാരിയാണ്‌. കോട്ടയം സെന്റ്‌ ജോസഫ്‌സ് കത്തീഡ്രല്‍, വെള്ളൂര്‍ സെന്റ്‌ സൈമണ്‍സ്‌, ഒളശ സെന്റ്‌ ജോണ്‍സ്‌, പൊന്‍പള്ളി സെന്റ്‌ ജോര്‍ജ്‌, വടവാതൂര്‍ മാര്‍ അപ്രേം, കുമരകം സെന്റ്‌ ജോണ്‍സ്‌ ആറ്റമംഗലം, ചിങ്ങവനം മാര്‍ അപ്രേം, കരിംകുളം സെന്റ്‌ ജോര്‍ജ്‌ തുടങ്ങി നിരവധി പള്ളികളില്‍ വികാരിയായിരുന്നു.
പൗരസ്‌ത്യ സുവിശേഷസമാജം ജോയിന്റ്‌ സെക്രട്ടറി, യാക്കോബായ സഭാ മാനേജിംഗ്‌ കമ്മിറ്റി അംഗം, വര്‍ക്കിംഗ്‌ കമ്മിറ്റി അംഗം, ഭദ്രാസന വൈദികസംഘം സെക്രട്ടറി, ഭദ്രാസന കൗണ്‍സില്‍ അംഗം, മണര്‍കാട്‌ സെന്റ്‌ മേരീസ്‌ കത്തീഡ്രലിനു കീഴിലുള്ള കോളജ്‌, ആശുപത്രി, ഹയര്‍ സെക്കന്‍ഡറി സ്‌കൂള്‍, സി.ബി.എസ്‌.ഇ. സ്‌കൂള്‍ തുടങ്ങിയ സ്‌ഥാപനങ്ങളുടെ മാനേജര്‍, ആത്മീയ പ്രസ്‌ഥാനങ്ങളുടെ രക്ഷാധികാരി എന്നീ നിലകളില്‍ സേവനമനുഷ്‌ഠിച്ചു. നാലു പതിറ്റാണ്ടിലേറെ മഞ്ഞനിക്കര തീര്‍ഥാടകസംഘത്തിന്റെ സെക്രട്ടറിയായിരുന്നു.
കോട്ടയം, മണര്‍കാട്‌, വെള്ളൂര്‍ വൈ.എം.സി.എകള്‍, കോട്ടയം പബ്ലിക്‌ ലൈബ്രറി, ഇന്ത്യന്‍ റെഡ്‌ക്രോസ്‌ സൊസൈറ്റി, പാമ്പാടി അഭയഭവന്‍, വേമ്പനാട്‌ ബോട്ട്‌റേസ്‌ അസോസിയേഷന്‍, പള്ളം ഭവനനിര്‍മാണ ബോര്‍ഡ്‌, വിജയപുരം സര്‍വീസ്‌ സഹകരണ ബാങ്ക്‌, കോട്ടയം സഹകരണ സര്‍ക്കിള്‍ യൂണിയന്‍ തുടങ്ങി ഒട്ടേറെ പ്രസ്‌ഥാനങ്ങളുടെ ഭരണസമിതിയംഗമായിരുന്നു. തേറത്താനം കുടുംബയോഗം സ്‌ഥാപക പ്രസിഡന്റും ദീര്‍ഘകാലമായി മുഖ്യരക്ഷാധികാരിയുമാണ്‌.
ഭാര്യ പുത്തന്‍കുരിശ്‌ പാടിയില്‍ മേരി ഏബ്രഹാം (പേരൂര്‍ ഗവ. എല്‍.പി. സ്‌കൂള്‍ റിട്ട. ഹെഡ്‌മിസ്‌ട്രസ്‌). മക്കള്‍: ഐസി മെറീനാ പോള്‍ (ചോറ്റാനിക്കര), ലിസ റോയി (ഷാര്‍ജ), റോയി ഏലിയാസ്‌ (പ്രൈംമിനിസ്‌റ്റേഴ്‌സ് ഓഫീസ്‌ ബഹ്‌റൈന്‍). മരുമക്കള്‍: ജോര്‍ജ്‌ പോള്‍ മണ്ണഞ്ചേരില്‍ ചോറ്റാനിക്കര (എന്‍ജിനീയര്‍), റോയി മാത്യു കൊല്ലംപറമ്പില്‍ കാരാപ്പുഴ (ചാര്‍ട്ടേഡ്‌ അക്കൗണ്ടന്റ്‌ ഷാര്‍ജ), അനിത റോയി പറങ്ങോട്ട്‌ (അല്‍മോയിക്‌ ഗ്രൂപ്പ്‌ ബഹ്‌റൈന്‍).
No comments:
Post a Comment