Thursday 9 June 2011
യാക്കോബായ വിദ്യാര്‍ഥി പ്രസ്‌ഥാനം ദേശീയ നേതൃത്വ പരിശീലന ക്യാമ്പ്‌ ലുമിന-2011 ഇന്ന്‌ ആരംഭിക്കും
മുളന്തുരുത്തി: യാക്കോബായ സഭയുടെ വിദ്യാര്‍ഥി പ്രസ്‌ഥാനമായ മോര്‍ ഗ്രിഗോറിയോസ്‌ ജാക്കബൈറ്റ്‌ സ്‌റ്റുഡന്റ്‌ മൂവ്‌മെന്റ്‌(എം.ജി.ജെ.എസ്‌.എം.) ദേശീയ നേതൃത്വ പരിശീലന ക്യാമ്പ്‌ 'ലുമിന-2011' മുളന്തുരുത്തി വെട്ടിക്കല്‍ ഉദയഗിരി വൈദിക സെമിനാരിയില്‍ ഇന്ന്‌ ആരംഭിക്കും. മൂന്നുദിവസം നീണ്ടുനില്‍ക്കുന്ന ക്യാമ്പില്‍ 300 വിദ്യാര്‍ഥി പ്രതിനിധികള്‍ പങ്കെടുക്കും. ഇന്നു വൈകിട്ട്‌ 6ന്‌ ശ്രേഷ്‌ഠ കാതോലിക്ക ബസേലിയോസ്‌ തോമസ്‌ പ്രഥമന്‍ ബാവ ക്യാമ്പ്‌ ഉദ്‌ഘാടനം ചെയ്യും. വിദ്യാര്‍ഥി പ്രസ്‌ഥാനത്തിന്റെ പ്രസിഡന്റ്‌ ഡോ. കുര്യാക്കോസ്‌ മോര്‍ തെയോഫിലോസ്‌ മെത്രാപ്പോലീത്ത അധ്യക്ഷം വഹിക്കും. എപ്പിസ്‌കോപ്പല്‍ സുന്നഹദോസ്‌ സെക്രട്ടറി ജോസഫ്‌ മാര്‍ ഗ്രിഗോറിയോസ്‌ വൈദിക സെമിനാരി പ്രിന്‍സിപ്പല്‍ മെത്രാപ്പോലീത്ത ഡോ. ആദായി ജേക്കബ്‌ കോറെപ്പിസ്‌കോപ്പ, ഫാ. ബോബി തറയാനി എന്നിവര്‍ പ്രസംഗിക്കും. ഞായര്‍ രാവിലെ കുര്‍ബാനയ്‌ക്കുശേഷം ക്യാമ്പ്‌ സമാപിക്കും.
യുണൈറ്റഡ്‌ നേഷന്‍ ഫിനാന്‍സ്‌ അഡ്വൈസര്‍ ഡോ. കെ.എം. ജോര്‍ജ്‌ മുഖ്യപ്രഭാഷണം നടത്തും. മാത്യൂസ്‌ മാര്‍ അഫ്രേം, പി.ആര്‍. വെങ്കിട്ടരാമന്‍, ഡോ. തോമസ്‌ എബ്രഹാം, ഫാ. സാജു പോട്ടയില്‍ എന്നിവര്‍ വിവിധ ക്ലാസുകള്‍ക്കു നേതൃത്വം നല്‍കും. 11നു രാത്രി 7.30ന്‌ കലാസായാഹ്നം തെന്നിന്ത്യന്‍ ചലച്ചിത്രതാരം കാര്‍ത്തിക ഉദ്‌ഘാടനം ചെയ്യും. കോളജ്‌, പ്രൊഫഷണല്‍ വിദ്യാര്‍ഥികളെ ലക്ഷ്യമാക്കി പ്രവര്‍ത്തിക്കുന്ന പ്രസ്‌ഥാനം ആലുവയിലെ പരി. മോര്‍ അത്താനാസിയോസ്‌ പൗലൂസ്‌ വലിയ തിരുമേനിയാണ്‌ ആരംഭിച്ചത്‌. കലാലയാന്തരീക്ഷത്തില്‍ ആത്മീയതയില്‍ നിന്നും മൂല്യങ്ങളില്‍ നിന്നും അകന്നു മദ്യത്തിനും മയക്കുമരുന്നിനും അടിമയായി ലക്ഷ്യബോധമില്ലാതെ വിദ്യാര്‍ഥികള്‍ ജീവിതം നഷ്‌ടപ്പെടുത്തുമ്പോള്‍ വിഭാഗീയ ചിന്തകള്‍ക്കപ്പുറത്തു മൂല്യതയും ആത്മീകതയും കുട്ടികളിലേക്കു പകരുക എന്നതാണ്‌ വിദ്യാര്‍ഥി പ്രസ്‌ഥാനത്തിന്റെ ലക്ഷ്യമെന്നു കുര്യാക്കോസ്‌ മാര്‍ തെയോഫിലോസ്‌ മെത്രാപ്പോലീത്ത പറഞ്ഞു.
പഠനം, കൗണ്‍സിലിംഗ്‌, കരിയര്‍ ഗൈഡന്‍സ്‌ തുടങ്ങിയവ ഉള്‍പ്പെടുത്തിക്കൊണ്ടുള്ള ക്യാമ്പില്‍ ഭാരതത്തിന്റെ വിവിധ ഭാഗങ്ങളില്‍ നിന്നുള്ള 300ഓളം പ്രതിനിധികള്‍ പങ്കെടുക്കും. പത്രസമ്മേളനത്തില്‍ ഡോ. കുര്യാക്കോസ്‌ മാര്‍ തെയോഫിലോസ്‌ മെത്രാപ്പോലീത്ത, ഡോ. ആദായി ജേക്കബ്‌ കോറെപ്പിസ്‌കോപ്പ, ഫാ. ബോബി തറയാനി, ഡി. അനീഷ്‌ കെ. ജോയി തുടങ്ങിയവര്‍ പങ്കെടുത്തു.
Subscribe to:
Post Comments (Atom)
No comments:
Post a Comment